Ҫӗнӗ Шупашкарти 8-мӗш вӑтам шкулӑн стадионне нумаях пулмасть тӗпрен юсаса ҫӗнетнӗ. Халӗ унта ют ҫынсене кӗртме пӑрахнӑ.
«Стадион алӑкне мӗншӗн питӗрсе илнӗ? Нумаях пулмасть ҫеҫ уҫнӑ марччӗ-и, халӗ унта кӗртмеҫҫӗ», — ыйтнӑ хулари «Грани» хаҫатран пӗри. Кӑларӑм ыйту хуравне шыранӑ.
Стадиона юсаса ҫӗнетмелли конкурсра пӗлтӗрхи пуш уйӑхӗнче «Прайд» общество ҫӗнтернӗ. Реконструкци хакӗ — 29 миллион тенкӗ ытларах. Подрядчик ӗҫе вӑхӑтра пурнӑҫласа ӗлкӗрейменрен стадиона кӑҫал ҫеҫ уҫнӑ.
Спорт сооруженийӗпе шкул ачисем тата 2-мӗш спорт шкулӗн воспитанникӗсем усӑ кураҫҫӗ. Уроксем хыҫҫӑн тата канмалли кунсенче стадиона питӗрсе илеҫҫӗ. Ҫавӑн официаллӑ сӑлтавӗ — вандализм. Хула администрацийӗн пуҫлӑхӗ Дмитрий Пулатов шухӑшланӑ тӑрӑх, ватма юратакан ҫынсем нумай мар, пӗр 20-30 ҫын.
«Эпир ку стадиона юсаса ҫӗнетессе тем пекех кӗтрӗмӗр, ачасемпе вӗсен ашшӗ-амӑшӗ савӑнса пӗтереймеҫҫӗ. Хулигансенчен сыхланса ҫитерейместпӗр — хӑть камера вырнаҫтарса тух. Шупашкарти «Олимпийский» стадионти пек мӗнпе те пулин сӗрсе тухмалла мар-ши тесе те аптӑранӑ енне пуҫ вататпӑр. Питех те варалакан, ҫумӑрпа хӗвеле парӑнман, анчах сиенсӗр тата усал шӑршӑсӑр солидол е литол пирки шухӑшлатпӑр», — тенӗ физкультура учителӗ Михаил Ананьев.
Пирӗн республикӑри хӑш-пӗр муниципалитетра ыркӑмӑллӑх центрӗсем ӗҫлеҫҫӗ. Унта ҫынсем хӑйсем унччен тӑхӑннӑ, анчах япӑхса кайман ҫипуҫа илсе пырса параҫҫӗ. Вӗсене хими хатӗрӗсемпе тасатнӑ хыҫҫӑн кирек кам та илсе кайса тӑхӑнма пултарать.
Шупашкарти ыркӑмӑллӑх центрӗсем ҫак адрессемпе вырнаҫнӑ:
1. 139-мӗш стрелоксен урамӗ, 22 («Байкал» суту-илӳ ҫурчӗ, 1-мӗш хут). Ӗҫ графикӗ: ытларикун-эрнекун – 13:00 сехетрен 19:00 сехетчен; шӑматкун – 11:00 сехетрен 16:00 сехетчен.
2. Декабристсен урамӗ, 18А.
Ӗҫ вӑхӑчӗ: ытларикун-эрнекун – 13:00 сехетрен 19:00 сехетчен; шӑматкун – с 11:00 сехетрен 16:00 сехетчен.
3. Энтузиастсен урамӗ, 34-мӗш ҫурт («Москва» (чӑв. Мускав) суту-илӳ центрӗ, 1-мӗш хут).
Ӗҫ вӑхӑчӗ: тунтикун-эрнекун – 11:00 сехетрен 17:00 сехетчен.
4. Шупашкар, И. Яковлев проспекчӗ, 3-мӗш ҫурт («Универ21Маг» суту-илӳ ҫурчӗ, 2-мӗш).
Ӗҫ вӑхӑчӗ: тунтикун-эрнекун – 15:00 сехетчен 19:00 сехетчен.
5. Трактор тӑвакансен проспекчӗ, 73 («Хӗрлӗ хӗрес» организаци).
Ӗҫ вӑхӑчӗ: 08:00 сехетрен пуҫласа 18:00 сехетчен. Телефон номерӗ 89871230814.
Унсӑр пуҫне ыркӑмӑллӑх центрӗсем Ҫӗнӗ Шупашкарпа Шупашкар районӗнче пур.
«Крокус Автон» лизинг тӳлевӗпе парӑмсем пухӑнсан унӑн автобусӗсене туртса илнӗ. Ҫапла Шупашкарта хӑш-пӗр маршрут ҫинчи транспорт пулман. Ҫынсен мӗн тумалла?
Шар курнӑ маршрутсенчен пӗри - 42- мӗш автобуссем. Нумаях пулмасть ыйтӑва татса панӑ – вӑхӑтлӑх перевозчик тупнӑ.
«Неман» автобуссем унччен Шупашкарта Ҫӗнӗ Шупашкара ҫӳрекен 262-мӗш маршрут ҫинче ӗҫленӗ. Халӗ вӗсем 42-мӗш маршрут ҫине тухнӑ.
Раҫҫей халӑх артистки Надежда Бабкина Чӑваш Енри хӑш-пӗр муниципалитетра концерт кӑтартӗ. Вӑл пирӗн тӑрӑха «Песни России» фестиваль-марафонпа килсе ҫитӗ. Асӑннӑ мероприяти ҫӗртме уйӑхӗн 9-18-мӗшӗсенче иртӗ.
16-мӗш фестиваль-марафонӑн ыркӑмӑллӑх концерчӗ Ҫӗнӗ Шупашкарта уҫӑлӗ, унтан артистсем Комсомольскине, Тӑвая, Шупашкара, Патӑрьеле, Вӑрнара, Ҫӗрпӗве, Хӗрлӗ Чутая, Кӳкеҫе тата Куславккана ҫитӗҫ.
Надежда Бабкинӑпа тата унӑн мухтавлӑ «Русская песня» (чӑв. Вырӑс юрри) патшалӑх ансамблӗпе пӗрлех сцена ҫине ҫӗршывӑн тӗрлӗ кӗтесӗнчи професси коллективӗсем тухӗҫ.
Ҫӗнӗ Шупашкарта васкавлӑ медпулӑшу фельдшерӗсем ӳсӗр ҫынна пулӑшу кӳрес вырӑнне урамра хӑварнӑ. Лешӗ вилнӗ. Кун тӗлӗшпе пуҫиле ӗҫ пуҫарнӑ.
Следстви версийӗ тӑрӑх, пӗлтӗр чӳк уйӑхӗн 30-мӗшӗнче васкавлӑ медпулӑшӑва пӗр картишре ӳсӗр ҫын выртни пирки шӑнкӑравласа пӗлтернӗ. Икӗ фельдшер вырӑна ҫитнӗ. Хайхискерсем пациента лартнӑ та пульницӑна мар, гараж ҫывӑхне илсе кайса антарса хӑварнӑ.
Арҫын ҫавӑнтах кӑштахран вилнӗ. Вӑл шӑнса кӳтнӗ.
Чӑваш Енре чи вулакан ҫемьесене палӑртнӑ. Конкурса республикӑн Ача-пӑчапа ҫамрӑксен вулавӑшӗ ирттернӗ.
«Вулакан ҫемьепе палаштарни» номинацире Муркаш районӗнчи Васильевсем пӗрремӗш вырӑн йышӑннӑ, Вӑрмар районӗнчи Артюковсем — иккӗмӗш, Ҫӗнӗ Шупашкарти Павловсем — виҫҫӗмӗш.
«Илемлӗ хайлав тӑрӑх инсценировка» номинацире Канашри Николаевсене ҫитекен пулман, иккӗмӗш вырӑнта — Улатӑрти Логиновсем, виҫҫӗмӗшӗнче — Йӗпреҫ районӗнчи Степановсем.
Чӑваш чӗлхине упраса хӑварас тата сарас енӗпе Комсомольски районӗнчи Петровсене палӑртса хӑварнӑ, Муркаш районӗнчи Кузьмичевсем конкурс материалӗсене хӑйне евӗр хатӗрленипе ыттисенчен уйрӑлса тӑнӑ.
Ҫӗнӗ Шупашкарта пурӑннӑ 37 ҫулти арҫынна суд 22 ҫуллӑха тӗрмене хупса хума йышӑннӑ. Вӑл ачасем ҫумне ҫулӑхма юратнӑ. 2007 ҫулта ӑна ҫавӑншӑн 15 ҫуллӑха хупса хунӑ-ха. 2020 ҫулхи ҫурла уйӑхӗнче ӑна ирӗке кӑларнӑ, анчах судпа айӑпланнӑ вӑхӑчӗ иртсе пӗтеймен. Ирӗкре савӑнса пурӑнас вырӑннӗ вӑл тепӗр икӗ хутчен пуҫтахланнӑ.
2021 ҫулхи кӑрлач уйӑхӗнче хайхи этем хӑй паллакан хӗрарӑмӑн килӗнче ӑна вӗлерессипе хӑратса пусмӑрланӑ. Арҫын ҫӗҫӗпе хӑмсарнӑ.
Ҫав ҫулхи нарӑс уйӑхӗн 17-мӗшӗнче Ҫӗнӗ Шупашкарти нумай хваттерлӗ ҫуртсенчен пӗрин картишӗнче 9 ҫулти хӗрачана асӑрханӑ, ун хыҫҫӑн подъезда кӗнӗ. Унта ача ҫумне ҫулӑхнӑ.
Ҫу уйӑхӗн 9-мӗшӗнче, ҫур ҫӗр иртсен, Кӳкеҫ ҫывӑхӗнче хӗрарӑм машина айне пулса вилнӗ.
"Город грехов" проект пӗлтернӗ тӑрӑх, авари Ҫӗнӗ Шупашкарпа Кӳкеҫ хушшинче пулнӑ. Хӗрарӑм юраман ҫӗрте ҫул урлӑ каҫма тӑнӑ, ун ҫине "Мерседес" пырса кӗнӗ.
Шел те, хӗрарӑм вилмеллех аманнӑ.
Ҫӗнӗ Шупашкарти Таврапӗлӳпе истори музейӗнче «Санӑн яту - Ҫӗнтерӳҫӗ» сӑнӳкерчӗксене куравӗ уҫӑлнӑ.
Тӗрлӗ ҫулта ӳкернӗ сӑнӳкерчӗксен авторӗсенчен ытларахӑшӗ пирӗн хушӑмӑрта ҫук та ӗнтӗ. Тӗслӗхрен, Александр тата Георгий Костинсем, Семен Игнатьев, Вячеслав Романов, Иван Никифоров тата ыттисем.
Курава хатӗрлессишӗн Сергей Журавлев фотоӑста нумай тӑрӑшнӑ тесен те йӑнӑшмӑпӑр. Вӑл, Чӑваш Енри фотокорреспондентсен музейне пуҫарса янӑскер, ӗлӗкхи чылай сӑнӳкерчӗке перекетлӗн пухса пынӑ. Курав валли ҫавсене ҫӗнетсе хатӗрленӗ.
Куравра Валерий Железняковӑн сӑнӳкерчӗкӗсен «Ҫӗнтерӳ кунӗ» ярӑмӗ те вырӑн тупнӑ. Вӗсене пурне те пӗр кун — ҫу уйӑхӗн 9-мӗшӗнче, анчах тӗрлӗ ҫулта, — пурнӑҫланӑ.
Ҫӗнӗ Шупашкарта пурӑнакан пӗр хӗрарӑм хӑйӗн ачи ҫинчен манса кайнӑ тейӗн. Унӑн алимент парӑмӗ пухӑнса кайнӑ, вӑл вара ним пулман пек пурӑннӑ. Суд нумаях пулмасть ӑна пӗтӗмӗшле режимлӑ колоние ҫур ҫуллӑха ӑсатма йышӑннӑ.
Алимент тӳлессинчен пӑрӑнса ҫӳрекенсене РФ Пуҫиле кодексӗн статйипе явап тыттарма пулать. Ҫӗнӗ Шупашкарти хӗрарӑм тӗлӗшпе шӑпах ҫапла йышӑннӑ та.
Хайхине унччен административлӑ майпа явап тыттарса пӑхнӑ-ха, анчах хӗрарӑм тӑна кӗмен. Вӑл пӗр хутчен 1000 тенкӗ тӳленӗ те ҫырлахнӑ. Пӗчӗк ывӑлӗ умӗнчи алимент парӑмӗ вара хӑйӗн 350 пин тенкӗрен те иртсе кайнӑ.
-1.7 °C